ಯಕ್ಷಮಿತ್ರರೊಂದಿಗೆ ಸ್ವಗತ...

ಎಲ್ಲೋ ಒಂದು ಕಡೆ ನೀರವ ರಾತ್ರಿಯಲ್ಲಿ ನಾಲ್ಕೈದು ಮಂದಿ ಯಕ್ಷಗಾನಕ್ಕೆ ಹೋಗೋದು. ಅಲ್ಲಿಂದಲೇ ಫೋಟೊ ತೆಗೆದು, ಹಾಡು ಧ್ವನಿಮುದ್ರಿಸಿ ವಾಟ್ಸಾಪ್ ಗ್ರೂಪಿಗೆ ಅಪ್ ಲೋಡ್ ಮಾಡೋದು. ನಮ್ಮ ಗ್ರೂಪಿನಲ್ಲಿರುವ 220 ಮಂದಿಯ ಮೊಬೈಲಿನಲ್ಲಿ ತಕ್ಷಣ ಅದು ಪ್ರತ್ಯಕ್ಷವಾಗೋದು. ಆಸಕ್ತರು ಡೌನ್ ಲೋಡ್ ಮಾಡಿ ನೋಡೋದು, ನಿರಾಸಕ್ತರು ಕ್ಲಿಯರ್ ಚಾಟ್ ಕೊಟ್ಟು ಮತ್ತೆ ಮಲಗೋದು. ಅತಿ ಆಸಕ್ತರು ಇನ್ನಷ್ಟು ಹಾಡು ಬರಲಿ ಅಂತ ಡಿಮ್ಯಾಂಡ್ ಮಾಡೋದು. ಇವೆಲ್ಲ ಯಕ್ಷಗಾನ ವಾಟ್ಸಾಪ್ ಗ್ರೂಪ್ ಶುರು ಮಾಡಿದ ಮತ್ತೆ ಕಂಡುಕೊಂಡ ಸ್ವಾರಸ್ಯಗಳು....

ಎತ್ತಣದ ಮಾಮರವೋ, ಎತ್ತಣವೋ ಕೋಗಿಲೆಯೋ ಅನ್ನುವ ಹಾಗೆ.
ಕವಳ ಹಾಕೋರು, ಬೀಡಿ ಸೇದೋರು ಸ್ನೇಹಿತರಾಗುವ ಹಾಗೆ. ಯಕ್ಷಗಾನ ನೋಡೋರು ಕೂಡಾ (ದುಶ್ಚಟದ ಸಾಲಿಗೆ ಸೇರಿಸಬೇಡಿ) ಯಕ್ಷಗಾನ ಎಂಬ ಕಾರಣಕ್ಕೆ ಇಲ್ಲಿ ಸ್ನೇಹಿತರಾಗಿದ್ದಾರೆ. ಯಾವುದೋ ಮೂಲೆಯ ಒಂದೂರಲ್ಲಿ ನಡೆಯುವ ಆಟದಲ್ಲಿ ಕೆಲವೊಮ್ಮೆ 50-60 ಮಂದಿ ಪ್ರೇಕ್ಷಕರಿರುತ್ತಾರೋ ಇಲ್ಲವೋ. ಆದರೆ, ಆ ಆಟಕ್ಕೆ ಹೋದ ನಮ್ಮ ಗ್ರೂಪಿನ ಸದಸ್ಯರು ಅದರ ಮಾಹಿತಿಯನ್ನು ಗ್ರೂಪಿಗೆ ಹಾಕಿದರೆ ತಕ್ಷಣ 220 ಮಂದಿಯನ್ನೂ ತಲಪುತ್ತದೆ. ಎಷ್ಟು ಮಂದಿ ನೋಡುತ್ತಾರೋ, ಬಿಡುತ್ತಾರೋ ಗೊತ್ತಿಲ್ಲ (ಅದನ್ನೂ ತಿಳ್ಕೊಳ್ಳಲು ತಂತ್ರಜ್ಞಾನವಿದೆ).
ಆದ್ರೂ ಎಂಥ ರೋಚಕ ವಿಷಯ ಇದಲ್ವ.

ನಮ್ಮ ಗ್ರೂಪಿನಲ್ಲಿ ಅಮೆರಿಕಾ, ಯುಎಇ, ಬೆಂಗಳೂರು, ತುಮಕೂರು, ಕಾಸರಗೋಡು, ಉಡುಪಿ, ಬ್ರಹ್ಮಾವರ, ಕುಂದಾಪುರ, ಮೈಸೂರು... ಹೀಗೆ ಬೇರೆ ಬೇರೆ ಪ್ರಾಂತ್ಯಗಳ ಸದಸ್ಯರಿದ್ದಾರೆ. ಮಂಗಳೂರಿನ ಒಂದು ಆಟದ ಮಾಹಿತಿ ಗ್ರೂಪಿನಲ್ಲಿ ಹಾಕಿದ ತಕ್ಷಣ ಅವೆಲ್ಲ ಅವರನ್ನು ಕ್ಷಣಾರ್ಧದಲ್ಲಿ ತಲಪುತ್ತದೆ. ನಾನಾ ಕಾರಣಗಳಿಂದ ಬಯಲಾಟಗಳಿಗೆ ಹೋಗಲಾಗದವರೂ ಈ ಹಾಡು, ಫೋಟೊ, ವಿಡಿಯೋ ನೋಡಿ ಸಮಾಧಾನ ಪಟ್ಟುಕೊಳ್ಳಬಹುದು. ತಾನೂ ಆಟದ ಭಾಗವಾದ ಹಾಗೆ ಖುಷಿಪಟ್ಟುಕೊಳ್ಳಬಹುದು.

ಕೆಲವು ಸ್ನೇಹಿತರು ಕೇಳುವುದುಂಟು ಇಷ್ಟೆಲ್ಲಾ ಹಾಡು ಹಾಕ್ತೀರಲ್ಲ... ಯಾರಾದ್ರೂ ನೋಡ್ತಾರ ಅಂತೆ. ಎಲ್ಲ ಹಾಡು, ಫೋಟೊವನ್ನು ಗ್ರೂಪಿನ ಎಲ್ಲಾ 220 ಮಂದಿ ನೋಡುವ ನಿರೀಕ್ಷೆ ಇಲ್ಲ. ಹಾಗೆ ನೋಡುವುದಕ್ಕೆ ಸಾಧ್ಯವೂ ಇಲ್ಲ. ಪ್ರತಿಯಬ್ಬರಿಗೂ ಅವರವರ ತಲೆಬಿಸಿ, ಕೆಲಸ ಕಾರ್ಯಗಳು ಇರುತ್ತವೆ. ಆದರೆ, ಆಟಗಳಿಗೇ ಹೋಗಲು ಸಾಧ್ಯವಿಲ್ಲದವರು, ಮುಖ್ಯವಾಗಿ ಕರಾವಳಿ ಬಿಟ್ಟು ಪರವೂರುಗಳಲ್ಲಿ ಇರುವವರು ಇಲ್ಲಿನ ಆಗುಹೋಗುಗಳನ್ನು ಗಮನಿಸುತ್ತಲೇ ಇರುತ್ತಾರೆ ಅಂತ ನಾನು ನಂಬಿದ್ದೇನೆ... ಅಥವಾ ಕನಿಷ್ಠ ಐದಾರು ಮಂದಿ ಕಟ್ಟಾ ಯಕ್ಷಪ್ರೇಮಿಗಳು ನಾವು ಹಾಕಿದ ಹಾಡು ಕೇಳಿದರೆ ನಮ್ಮ ಪ್ರಯತ್ನ ಸಾರ್ಥಕ. ಅಷ್ಟೆ. 
ಅಷ್ಟು ಮಂದಿಗೆ ಒಂದು ಬಯಲಾಟದ ಮಾಹಿತಿ, ನೇರಪ್ರಸಾರ ತಲುಪಿಸಿದ ಖುಷಿ ನಮಗೆ ಸಿಗುತ್ತದೆ.
ಯಕ್ಷಗಾನ ಪ್ರೇಮಿಗಳಿಗೆ ತಾವು ನೋಡಿದ ಆಟದ ಮಾಹಿತಿಯನ್ನು ನಾಲ್ಕಾರು ಮಂದಿ ಜೊತೆ ಹಂಚಿಕೊಂಡಾಗ ಖುಷಿ ಹೆಚ್ಚುತ್ತದೆ. ಇದೇ ಕಾರಣಕ್ಕೆ ನಮ್ಮ ಸಕ್ರಿಯ ಸದಸ್ಯರು ಉತ್ಸಾಹದಿಂದ ಹಾಡುಗಳನ್ನು, ಫೋಟೊಗಳನ್ನು ಶೇರ್ ಮಾಡುತ್ತಲೇ ಇರುತ್ತಾರೆ. ಬೇಕಾದವರು, ಬೇಕಾದ ಹಾಡುಗಳನ್ನು ಡೌನ್ಲೋಡ್ ಮಾಡ್ಕೊಂಡು ಕೇಳ್ತಾರೆ. ಪುರುಸೊತ್ತಿದ್ದವರು ಪ್ರತಿಕ್ರಿಯೆ ನೀಡುತ್ತಾರೆ. ತೀರಾ ಬಿಝಿ ಇದ್ದವರು ಆಗೊಮ್ಮೆ ಈಗೊಮ್ಮೆ ಇಣುಕುತ್ತಾರೆ ಇಲ್ಲೇನು ನಡೀತಾ ಇದೆ ಎಂದು....

ಲೋಕೋ ಭಿನ್ನ ರುಚಿ...
ವಿಭಿನ್ನ ಅಭಿರುಚಿ, ಊರು, ಪ್ರಾಂತ್ಯ, ಪ್ರದೇಶ, ವೃತ್ತಿ ಬದುಕಿನ ಸದಸ್ಯರ ಕೂಡುತಾಣವಿದು. ಎಲ್ಲದರ ಸಮ್ಮಿಲನವೇ ಒಂದು ವಾಟ್ಸಾಪ್ ಗ್ರೂಪ್. ಆಟಗಳ ಮಾಹಿತಿ, ಸೈದ್ಧಾಂತಿಕ ಜಿಲ್ನಾಸೆ ಎಲ್ಲದಕ್ಕೂ ಆರೋಗ್ಯಕರವಾಗಿ ನಮ್ಮ ಗ್ರೂಪ್ ಸ್ಪಂದಿಸುತ್ತಿರುವುದು ಸಮಾಧಾನದ ಸಂಗತಿ. ಮಹಿಷಾಸುರ ಕೊಂಬಿನಿಂದ ಪ್ರೇಕ್ಷಕರನ್ನು ಎಸೆದ ಎಂಬ ಸುದ್ದಿಗೆ ವೀಡಿಯೋ ಸಹಿತ ಸಾಕ್ಷಾತ್ ವರದಿಗಳೂ ಬಂದು ಸೇರಿದವು. ಪುತ್ತೂರು ಎಡನೀರು ಮೇಳದ ಆಟದ ಗೊಂದಲದ ಬಗ್ಗೆ ತಕ್ಷಣದ ಮಾಹಿತಿ ಮಾತ್ರವಲ್ಲ ಸ್ವತಃ ಕಲಾವಿದರ ಪ್ರತಿಕ್ರಿಯೆ ಕೂಡಾ ಬಲ್ಲಿರೇನಯ್ಯ ಬಳಗಕ್ಕೆ ಸಿಕ್ಕಿತು. ಎಲ್ಲವೂ ಇಲ್ಲಿ ಪ್ರಕಟಗೊಂಡಿತು. ವಿಷಯದ ಎಲ್ಲ ಮಗ್ಗುಲುಗುಳೂ ತಿಳಿದುಬಂತು. ಇದನ್ನೇ ಆರೋಗ್ಯಕರ ಚರ್ಚೆ ಎನ್ನುವುದು.

ಇನ್ನೊಂದು ಮಾತು... ಒಂದು ಗುಂಪು ಕಟ್ಟಿ ಅದನ್ನು ಉಳಿಸುವಲ್ಲಿ ಹಲವರು ಸಾಕಷ್ಟು ಶ್ರಮ ವಹಿಸರುತ್ತಾರೆ. ಹಾಗಾಗಿ ಹೊಸ ಸದಸ್ಯರನ್ನು ನೀವು ರೇಫರ್ ಮಾಡುವುದಿದ್ದಲ್ಲಿ ಅವರಿಗೆ ಈ ಗ್ರೂಪಿನ ಸ್ವರೂಪ ವಿವರಿಸಿ ಆಸಕ್ತಿ ಇದ್ದರೆ ಮಾತ್ರ ಸೇರಿಸುವ. 
ಅದೇ ರೀತಿ ಯಾರಾದರೂ ಗ್ರೂಪ್ ತ್ಯಜಿಸುವುದಿದ್ದರೆ ಕಾರಣ ಹೇಳಿ ಹೋಗಿ. ಏಕಾಏಕಿ ಗ್ರೂಪ್ ತ್ಯಜಿಸಿದರೆ ನಮಗೆ ಗೊಂದಲವಾಗುತ್ತದೆ. ಯಾಕೆ ಗ್ರೂಪ್ ಬಿಟ್ಟರು ಅಂತ. ಯಾವುದೋ ಕಾರಣಕ್ಕೆ ನೀವು ಗ್ರೂಪ್ ಬಿಟ್ಟಿರುತ್ತೀರಿ. ಅದರ ಕಾರಣ ತಿಳಿದರೆ, ಒಂದು ವೇಳೆ ನಮ್ಮ ಕಡೆಯಿಂದ ತಪ್ಪಾಗಿದ್ದರೆ ತಿದ್ದಿಕೊಳ್ಳಲು ನಮಗೆ ಅನುಕೂಲವಾಗುತ್ತದೆ. ಅದಕ್ಕಾಗಿ ಈ ಮನವಿ.


ತುಂಬಾ ಮಂದಿ ಬಿಡುವಿಲ್ಲದ ಕೆಲಸಗಳ ನಡುವೆಯೂ ನಿದ್ದೆಗೆಟ್ಟು ಇಡೀ ರಾತ್ರಿ ಆಟಗಳಿಗೆ ಹೋಗಿ ಪಾಪ ಮಾಹಿತಿ ಶೇರ್ ಮಾಡ್ತಾರೆ. ನಿಮಗೆ ಅವರ ಕಾರ್ಯ ಇಷ್ಟವಾಗಿದ್ದರೆ ದಯವಿಟ್ಟು ಅವರಿಗೊಂದು ಲೈಕ್ ಕೊಡಿ. ಅವರ ಕಲಾಸೇವೆಯನ್ನು ಪ್ರೋತ್ಸಾಹಿಸಿ. ಇದೊಂದು ನಿಸ್ವಾರ್ಥ ಕಾರ್ಯ ಅಷ್ಟೆ. ತುಂಬಾ ಮಂದಿ ಆಟಕ್ಕೆಹೋಗಿ ಟೆನ್ಶನ್ ಕಡಿಮೆ ಮಾಡ್ಕೊಳ್ತಾರೆ. ತಾವು ಕಂಡ ಖುಷಿಯನ್ನು ನಿಮ್ಮೊಂದಿಗೂ ಹಂಚಿಕೊಳ್ತಾರೆ. ಅವರ ಕೆಲಸವನ್ನು ಗುರುತಿಸಿ, ಪ್ರೋತ್ಸಾಹಿಸಿ.

PHOTO; Karunkara Balkur

----------
ಒಂದು ನೀರವ ರಾತ್ರಿ.... ಸುರಿಯುವ ಮಂಜಿನ ಮೈದಾನದಲ್ಲಿ ಅಂಗೈಯಗಲದ ಮೊಬೈಲಿನೊಂದಿಗೆ ಕುಳಿತ ವ್ಯಕ್ತಿ ವಾಟ್ಸಾಪ್ ಅಚ್ಚರಿ ಮೂಲಕ 220 ಮಂದಿಯನ್ನು ಏಕಕಾಲಕ್ಕೆ ತಲಪುವ ತಂತ್ರಜ್ಞಾನಕ್ಕೆ ಶರಣು.
ಯಕ್ಷಗಾನಂ ಗೆಲ್ಗೆ.
-ಕೆಎಂ.