ತೋಚಿದ್ದು, ಗೀಚಿದ್ದು 3

ಪ್ರೀಪೇಯ್ಡ್ ಬದುಕು...


ತುಂಬಿಟ್ಟ ಆಹಾರ ಬಡಿಸಿ ಉಣ್ಣುವ ಬಫೆಯಲ್ಲ...
ಪಂಕ್ತಿಯಲ್ಲಿ ಕುಳಿತವನ ಪಾಲಿಗೆ
ಬಂದದ್ದೇ ಪಂಚಾಮೃತ...
ಉಪ್ಪು, ಹುಳಿ, ಖಾರ ಹೆಚ್ಚು ಕಮ್ಮಿಯಾದರೆ
ತುಸು ಅಡ್ಜಸ್ಟ್ ಮಾಡ್ಕೊಳ್ಳಿ
ಅಡುಗೆ ಮೊದಲೇ ಆಗಿದೆ
ರುಚಿ ಅಂದ್ಕೊಂಡು ಉಣ್ಣುವುದಷ್ಟೇ ಬಾಕಿ!

ಪ್ರತಿಯೊಬ್ಬರೂ ಪ್ರೀಪೇಯ್ಡ್ ಸಿಮ್ಮುಗಳು
ಪ್ಲಾನ್ ನಿಗದಿಯಾಗಿದೆ
ವ್ಯಾಲಿಡಿಟಿ ನಿಶ್ಚಯವಿಲ್ಲ,
ಟಾಪ್ ಅಪ್ ಹಾಕಿಸ್ತಾ ಇರಿ, ಇನ್ ಕಮಿಂಗ್ ನಿಗದಿತ...
ಔಟ್ ಗೋಯಿಂಗ್ ಗೆ ವ್ಯಾಲಿಡಿಟಿಯಿಲ್ಲ
ಆಫರ್ ಗಳು ಬದಲಾಗ್ತಾ ಇರ್ತವೆ
ಎಷ್ಟು ದಿನ ಅಂತ ಹೇಳೋ ಹಂಗಿಲ್ಲ!

ಮೊದಲೇ ಸ್ಕೆಚ್ ಮಾಡಿ, ಬ್ಲೂಪ್ರಿಂಟ್ ಹಾಕ್ಸಿ
ಭವಿಷ್ಯವನ್ನು ವರ್ತಮಾನದಲ್ಲೇ ಕಂಡು
ಸುಖ, ಸಂತಸಕ್ಕೆ ಲಾಕ್ ಹಾಕಿಟ್ಟು ತಣ್ಣಗಿರಬಹುದೇ?
ವರ್ತಮಾನಕ್ಕೆ ಆಂಟಿ ವೈರಸ್ ಕಂಡುಹುಡುಕಿಲ್ಲ
ಖುಷಿ, ಆರೋಗ್ಯ, ಆಯುಷ್ಯಕ್ಕೆ ಫಿಕ್ಸೆಡ್ ಡೆಪಾಸಿಟ್ಟಿಲ್ಲ
ದುಡ್ಡು ಕೊಟ್ಟು ಹಣೆಬರಹ ಖರೀದಿ ಆಗಲ್ಲ
ಅವರವರ ಬದುಕಿನ ಚಿತ್ರಕತೆಗೆ ಸ್ವಯಂ ಸಾಕ್ಷಿಗಳು

ಕಸಿದು ತಂದದ್ದು, ಅತಿಯಾಸೆಯಿಂದ ಪಡೆದದ್ದು
ಹುಸಿಯಾಡಿ ದಾರಿ ಬದಲಿಸಿದ್ದು, ಎಷ್ಟು ದಿನ ಬಂದೀತು?
ಸೆಟ್ ಬದಲಿಸಿದರೂ ಸಿಮ್ಮು ಅದೇ ತಾನೆ
ಪೋರ್ಟ್ ಮಾಡಿದರೂ ನಂಬರ್ ಬದಲಾಗುದಿಲ್ವಲ್ಲ?
ರೋಮಿಂಗು, ಟಾಕಿಂಗು, ಡೇಟಾ ಮುಗಿಯೋದೆಲ್ಲ
ಪ್ಲಾನ್ ಪ್ರಕಾರ ನಡೆಯೋದು
ಸಿಂ ಮೇಲೆ ಗೀಚೋ ಹಾಗುಂಟೇ...!

ಪುಸ್ತಕದ ಬದನೆಕಾಯಿ, ಕವಿ ಕಲ್ಪನೆ
ಜೀವನಮುಖಿ ಪ್ರವಚನ, ನಾಣ್ನುಡಿ, ಹಿತೋಕ್ತಿ
ಬದುಕಲು ಕಲಿಯುವ ಕೋರ್ಸುಗಳ ಬಳಿಕವೂ
ವಾಸ್ತವದ ಕನ್ನಡಿಯಲ್ಲಿ, ಕಂಡ ಕಟು ನಡೆಯಲ್ಲಿ
ಒಂದೊಂದು ಜೀವವೂ ಒಂದೊಂದು ಮೊಬೈಲು
ಸರ್ವಿಸ್ ಪ್ರೊವೈಡರು ಬೇರೆ ಬೇರೆ, ಪ್ಲಾನುಗಳು ಕೂಡಾ...
ನೆಟ್ವರ್ಕ್ ಹೆಚ್ಚು ಕಮ್ಮಿ, ಪ್ಲಾನ್ ಗಳೂ ಡಿಫರೆಂಟು

-KM.
 -------------------------

ಕಾಣೆಯಾಗಿದೆ...


ಕ್ಯಾನ್ವಾಸಿನ ಮೇಲೆ ಹರಡಿದ
ಬಣ್ಣಕ್ಕೆ ಅರ್ಥ ಸಿಗ್ತಾ ಇಲ್ಲ
ಚಿತ್ರಕ್ಕೆ ಸ್ಪಷ್ಟತೆಯಿಲ್ಲ, ಅಸಲಿಗೆ ಚಿತ್ರವೇ ಕಾಣ್ತಿಲ್ಲ
ಚದುರಿ ಹೋಗಿದೆ
ಬೊಗಸೆಗೆ, ಕುಂಚದ ಅರಿವಿಗೆ ಸಿಕ್ಕದಷ್ಟು ಚೆಲ್ಲಾಪಿಲ್ಲಿ


ಕಲ್ಪನೆ ಸೊರಗಿದೆ, ಭಾವ ಮೌನಕ್ಕೆ ಜಾರಿದೆ
ಚಿತ್ರಪಟ ಹರವೇ ತಿಳಿಯುತ್ತಿಲ್ಲ,
ಏರುತಗ್ಗಾಗಿದೆ ಚಿತ್ರಪಟ, ಬ್ರಶ್ಶು ಓಡ್ತಿಲ್ಲ
ಸೃಜನಶೀಲತೆಗೆ ಮಂಕುಬಡಿದಿದೆ
ವಕ್ರ ಗೆರೆಗಳು ಕಲೆಯಾಗುವಲ್ಲಿ ಬಡವಾಗುತ್ತಿದೆ...


ಕ್ಷಣಮಾತ್ರದಲ್ಲಿ ಗೀಚಿದ್ದೂ ಕಲಾಕೃತಿ
ಎನಿಸುತ್ತಿದ್ದ ದಿನಗಳು ಮಸುಕಾಗಿವೆ
ಚಿತ್ರಗಾರನ ಬೆರಳುಗಳು ಕೃಶವಾಗಿವೆ
ಉದಾಸೀನವಾಗಿವೆ, ಬೆಳಕು ಕಡಿಮೆಯಾಗಿದೆ
ಗೀಚಲೂ ತೋಚದಷ್ಟು ಮಂದ ಪ್ರಕಾಶ...


ಹಳೆ ಯಶಸ್ಸಿನ ಅಮಲಿನ ಟಾನಿಕ್ಕೇ
ಕುಡಿದು ಬದುಕುವ ಜೀವಕ್ಕೆ ಹೊಸತುಗಳು
ಬಾರದೆ, ಇಂದುಗಳು ಭಾರವಾಗಿ
ನಾಳೆಗಳು ದೂರವಾಗಿ...ಓರೆಕೋರೆಗಳ
ಅಮೂರ್ತ ಭಾವವೇ ಬಣ್ಣಗಳಾಗಿ ಕದಡಿದೆ

ಕ್ಷೀಣವಾಗಿದೆ ಇಂದು, ಕಾಣದಾಗಿದೆ ನಾಳೆ,
ಅಣಕಿಸುತ್ತಿದೆ ಖಾಲಿಹಾಳೆ...
ಗೀಚಿದಷ್ಟೂ ಗೀಚಲಾಗದೆ,
ಬೋಳುಬೋಳಾಗಿ ಉಳಿಸಲಾಗದೆ
ತೊಳಲಾಡಿದೆ ಭಾವ, ಕಳೆದು ಹೋಗಿದೆ ಜೀವ...
 --------------

ಒಗಟುಗಳೇ ಕಗ್ಗಂಟು!

---------


ಕನಸುಗಳು ಮೂಡುವುದೋ, ಕಾಡುವುದೋ
ಚಿಗುರುವುದೋ, ಅರಳುವುದೋ
ಮತ್ತೊಮ್ಮೆ... ಕಮರುವುದೋ, ಬಾಡುವುದೋ
ಮನಸಲ್ಲೇ ನರಳುವುದೋ?

ನಿರಾಸೆಯ ಜನಕ ನಿರೀಕ್ಷೆ
ಹುಟ್ಟುವುದೋ, ತಿಳಿಯದೇ ಕಟ್ಟುವುದೋ
ಬಳಿಯಲ್ಲೇ ಇದ್ದು ಕನಸಿಗೆ ನೀರೆರದು
ಪರೀಕ್ಷಿಸಿ ಮತ್ತೆ ಹೇಳದೆ ಕೇಳದೆ ತೆರಳುವುದೋ...?

ಭ್ರಮೆ ಆವರಿಸುವುದೋ, ನೇವರಿಸುವುದೋ
ಸಾವರಿಸುವ ಮುನ್ನ ಕಾತರಿಸಿ ನಿರೀಕ್ಷೆಗಳ
ಶೇಖರಿಸಿ, ಕಸನಸ್ಸೂ ಕಟ್ಟಿಸಿ, ಮಂಜಿನ
ತೆರೆ ಸರಿಸಿ ವಿಶ್ವರೂಪ ದರ್ಶನ ತೋರುವುದೋ...?

ಖುಷಿ ದೊರಕುವುದೋ, ಅಲ್ಲಿ ಇಲ್ಲಿ ಹುಡುಕುವುದೋ
ತನ್ನೊಳಗೇ ಅರಸುವುದೋ, ಸಿಕ್ಕಿತೆಂಬ
ನಿರೀಕ್ಷೆಯನ್ನೇ ಅಪ್ಪಿಕೊಂಡು ಸಂತಸದ
ಭ್ರಮೆಯಲ್ಲೇ ಕಟ್ಟುವ ಕನಸಿಗೇ ಕಾವು ಕೊಡುವುದೋ?

ಅಸಹಾಯಕತೆ ಹುಡುಕಿ ಬರುವುದೋ,
ಮನಸ ಮಥಿಸಿದಾಗ ಜನಿಸುವುದೋ
ಕನಸು, ಭ್ರಮೆ, ನಿರಾಸೆ, ಖುಷಿಗಳ ಒಗಟು
ಬಿಡಿಸಾಗದೆ, ದೊರಕುವ ಉತ್ತರವೋ..?

-KM


ಅಪ್ರಕಟಿತ ಕತೆಗಳು
....

ಪ್ರತಿ‌ ಮನಸ್ಸೂ
ಓದದ ಪುಸ್ತಕ....
ಪರದೆ ಹಾಕಿದ ಮಸ್ತಕದೊಳಗಿನ
ನಿಗೂಢ ಬರಹಗಳ ಗೂಢಲಿಪಿಗೆ
ಅವರವರೇ ಭಾಷಾಂತರಕಾರರು!

ರಕ್ಷಾಪುಟದ ಚೆಂದದ ಚಿತ್ರಕ್ಕೂ
ಒಳಗಡೆ ಓದದೇ ಬಾಕಿಯಾದ ಕತೆಗಳಿಗೂ
ಸಂಬಂಧವೇ ಇಲ್ಲ...
ಯಾಕೋ ಮುನ್ನುಡಿಗೂ ಶೀರ್ಷಿಕೆಗೂ
ಮ್ಯಾಚೇ ಆಗ್ತಿಲ್ಲ
ಅಸಲಿಗೆ ಪುಟ ತರೆಯೋದೇ ಕಷ್ಟ,
ತೆರೆದರೂ ಎಲ್ಲ ಅಸ್ಪಷ್ಟ!

ಒಂದೊಂದು ಮನಸ್ಸಿನ ಹಿಂದೆಯೂ
ಒಂದೊಂದು ಕತೆ, ನಿಟ್ಟುಸಿರು...
ಧಾರಾವಾಹಿಗೂ ಮಿಗಿಲಾದ
ತಿರುವುಗಳು, ಪೆನ್ನಿನ ಶಾಯಿಗೂ
ಕಂಪ್ಯೂಟರಿನ ಇಂಟರ್ನಲ್ ಮೆಮೊರಿಗೂ ದಕ್ಕದ್ದು
ಬಹಿರಂಗ ಬರೆಯಲಾಗದ್ದು...
ಪುಟ ತೆರೆದರೆ ತಾನೇ ಕತೆ ಕಾಣೋದು? 

ಗಟ್ಟಿಯಾಗಿ ಕಂತೆ ಕಟ್ಟಿ ಮನಸಿನ
ಮೂಲೆಯಲ್ಲಿ ಬಚ್ಚಿಟ್ಟ ಪುಸ್ತಕಗಳ
ಧೂಳು ಹೊಡೆದು ಮಾತಾಡಿಸಿದರೆ
ಹೊರಬರುವ ಕತೆಗಳೆಲ್ಲ ಅನಿರೀಕ್ಷಿತ, ಕಲ್ಪನೆಗೇ ಮೀರಿದ್ದು
ಎಲ್ಲರೂ ಬರೆಯಲಾರರು... 

ಹೇಳಲಾಗದೆ, ಜೀರ್ಣಿಸಲಾಗದೆ
ತಿರುವುಗಳ ದಾಟಲಾಗದೆ, ಸೋತದ್ದು,
ಮೋಸ ಹೋಗಿದ್ದು
ಎಲ್ಲ ನಿರೀಕ್ಷೆ ಕಳೆದೊಮ್ಮೆ
ಅಕ್ಷರಶಃ ಸತ್ತು ಬದುಕಿದ ಕತೆ...
ಅಚ್ಚಾಗಿಲ್ಲ, ಯಾರಿಗೂ ಸಿಕ್ಕಿಲ್ಲ!

ನಗುವ ಡಿಪಿ, ಸಾಂತ್ವನದ ಸ್ಟೇಟಸ್ಸು,
ಎಫ್ ಬಿ ವಾಲಿನಲ್ಲಿ ಜೀವನೋತ್ಸಾಹದ
ಸಾಲುಗಳ ಹಿಂದಿನ ಒಂದೊಂದು ನೊಂದ
ಮನಸಿನ, ಕಣ್ಣೀರ ಕಲೆಗಳ ಕತೆ
ಜಾಲಾಡುವ ತಾಣಕ್ಕೆ ಅಪ್ಲೋಡ್
ಆಗ್ತಿಲ್ಲ, ಗೂಗಲ್ಲಿಗೂ ಸಿಗ್ತಿಲ್ಲ!

ಏನು ಮಾಡ್ತೀರ? ಅಪ್ರಕಟಿತ ಕತೆಗಳನ್ನೋದಿ?
ತಿರುವು ಬದಲಿಸ್ತೀರ?
ಸುಖಾಂತ್ಯ ಮಾಡ್ತೀರ?
ನಿಗದಿಯಾಗಿ ಮುಗಿದ ಕತೆಗಳು
ಪ್ರಕಟವಾದರೂ ಲೈಕು,ಕಮೆಂಟು ಗಿಟ್ಟೋದಿಲ್ಲ!

ಸಾಂತ್ವನಕ್ಕೂ, ಸಲಹೆಗಳಿಗೂ
ಮೀರಿದ, ಭಾಷೆಗೆ ಇಳಿಯದ
ಭಾವದ ಸುಪ್ತ ಲೋಕದೊಳಗಿನ ಅಜ್ನಾತ ಕತೆ ಅಪ್ರಕಟಿತವಾಗೇ ಇರಲಿ
ಮತ್ತೆ ಕೆದಕಿ, ವರ್ತಮಾನದ
ಕಾವ್ಯ ಸೊಬಗು ಅಳಿಯದಿರಲಿ!
-KM

...........................

ಬಾಡಲಿ ಬಿಡಿ ತನ್ನಷ್ಟಕ್ಕೇ...
--

ಮುಂಜಾನೆ
ಸುರಿದು ಕೆಸರಿಗೇ ಬಿದ್ದರೂ
ಮಸುಕಾಗದ ಅಚ್ಚ ಬಿಳಿಯ ಎಸಳು
ಕೈಯೆಲ್ಲಾ ಕೆಂಪಾಗಿಸುವ ದಟ್ಟ ತೊಟ್ಟು...
ನಾವು ಮುಟ್ಟಿ ಮಾಲೆ ಮಾಡಿದ
ಮೇಲಲ್ಲವೇ ಬಾಡಿ ಬೆಂಡಾಗಿ
ಬಳಲಿ, ಕೊನೆಗೊಮ್ಮ ಮುದ್ದೆಯಾಗುವುದು.
ಇರಲಿ ಬಿಡಲಿ ಅದರಷ್ಟಕ್ಕೇ
ನಗುನಗುತ್ತಾ ಗಿಡದಲ್ಲಿ
ನಳನಳಿಸಿ ಬುಡದಲ್ಲಿ
ಬಾಡಲಿ ಬಿಡಿ ತನ್ನಷ್ಟಕ್ಕೇ....

-KM

...................

ಹೆಜ್ಜೆ ಗುರುತು...

 
...
ಓರೆಕೋರೆ
ಅಂಕುಡೊಂಕು
ಏರು ತಗ್ಗು
ಹತ್ತಿದ್ದೆಷ್ಟೋ
ಇಳಿದದ್ದೆಷ್ಟೋ
ಸವೆದದ್ದೆಷ್ಟೋ
ಹಂಪುಗಳು
ಗುಂಡಿಗಳು
ಗಂಡಾಂತರಗಳು
ಅರ್ಧದಲ್ಲೇ ಬಿಟ್ಟು ನಡೆದವರು
ಪಕ್ಕದ ಕ್ರಾಸಿನಲ್ಲಿ
ಬಂದು ಸೇರಿದವರು...
ಜೊತೆಗೆ ನಡೆದವರು
ಹೊತ್ತಿನ ಪರಿವಿಯಿಲ್ಲದೆ
ಹತ್ತಿರವಾದವರು
ಇಷ್ಟವಾಗದೆ ಥಟ್ಟನೆ ದಾರಿ ಬದಲಿಸಿದವರು...
ಸುಸ್ತಾಗಿ ಕುಳಿತವರು
ಕೆಸರು ಎರಚಿದವರು
ಪಂಕ್ಚರ್ ಆಗಿ ಪೆಚ್ಚಾದವರು,
ಹಿಂದಿಕ್ಕಿದವರು
ನೋಡನೋಡುತ್ತಾ ಮೈಲುದ್ದ ದಾಟಿ ಕಣ್ಮರೆಯಾದವರು...

ಹಿಂದೆ ಹೊರಟ ಜಾಗ ಕಾಣ್ತಿಲ್ಲ
ಮುಂದೆ ಅಂತ್ಯ ಅಸ್ಪಷ್ಟ
ನ್ಯೂಟ್ರಲ್ ಮುಗ್ದ ಮೇಲೆ
ಗೇರು ಬದಲಾಗ್ತದೆ ಅಂತ ಕಲಿಸಿದ
ಗುರು!
ಹಿಂತಿರುಗಿ ನೋಡಿದಾಗ
ಕಂಡ ಮಾರ್ಗ(ದ)ದರ್ಶನ.
-KM.