ನಿಂತ ನೀರು

ಉಕ್ಕುಕ್ಕಿ ಚಿಮ್ಮುವ ಅಂದ
ನೊರೆ ಸಹಿತ ಹಾರುವ ತಂಪಿನ ಸಿಂಚನ
ಒಮ್ಮೆ ಮೇಲೆ ಹಾರಿ
ಮಗದೊಮ್ಮೆ ಕೆಳಗಿಳಿದು
ಅತ್ತಿತ್ತ ಓಲಾಡಿ
ಮತ್ತೆ ಉಸಿರ ಬಿಗಿ ಹಿಡಿದು
ನೆಗೆಯುವ ಸೊಬಗು...

ಆದರೆ...
ನೆಗೆಯುವುದಕ್ಕೂ ಮಿತಿಯುಂಟು
ವಿಸ್ತಾರಕ್ಕೂ ಪರಿಧಿಯುಂಟು
ಎತ್ತರ, ಅಗಲ, ಚಿಮ್ಮುವ ಅವಧಿ
ಬಳಸುವ ನೀರು
ಮೂಡುವ ಆಕೃತಿಗೆ ರೂಪುರೇಷೆ
ಮಾಡಿಟ್ಟವರಿದ್ದಾರೆ ಅಜ್ಞಾತರಾಗಿ...

ಶಕ್ತಿ ಮೀರಿ ಹಾರಲಾಗದು
ಲಾಗ ಹೊಡೆದು ಮೆರೆಯಲಾಗದು
ಗಾಳಿಗೂ ಮೀರಿ
ಲೆಕ್ಕವನ್ನೂ ಹಾರಿ
ಏರಲೂ ಇಳಿಯಲೂ
ಶಕ್ತಿ ಸಾಲದು
ಅನುಮತಿ ಸಿಕ್ಕದು

ನಿಂತ ನೀರು
ಮತ್ತೆ ಮತ್ತೆ ಕಾರಂಜಿಯಾಗಿ
ಹಾರುವ ಚೆಂದಕ್ಕೆ
ಪಂಪು, ಕರೆಂಟಿನ
ಸಾಥ್ ಕಾಣುವುದಿಲ್ಲ
ಪವರು ಕಟ್ಟಾದರೆ
ಬುಗ್ಗೆ ಮೇಲೆರುವುದಿಲ್ಲ

ಹರಿಯದ ನೀರು
ಲೋಕ ಕಾಣದೆ
ನಿಂತಲ್ಲೇ ನಿಂತು
ಹಾರಿದರೂ, ಕುಣಿದರೂ
ಪರಿಧಿ ಸೀಮಿತ
ನಡೆದ ದಾರಿ ಶೂನ್ಯ
ಕಾಣುವುದಕ್ಕೂ ಕಂಡುಕೊಳ್ಳುವುದಕ್ಕೂ
ವ್ಯತ್ಯಾಸವಿದೆ!
-KM